Azərbaycan Respublikası Xüsusi Dövlət Mühafizə Xidməti

AZƏRBAYCAN RESPUBLİKASI
XÜSUSİ DÖVLƏT MÜHAFİZƏ XİDMƏTİ


Xəbərlər

15.02.2017

«Məsuliyyətli ovçuluq - biomüxtəlifliyin keşiyində» layihəsi çərçivəsində seminar keçirildi.

15 fevral 2017-ci il tarixində IDEA İctimai Birliyinin təşəbbüsü ilə «Məsuliyyətli ovçuluq - biomüxtəlifliyin keşiyində» layihəsi çərçivəsində Zirə Mədəniyyət Mərkəzi - Eko Parkda seminar keçirilmişdir.

Seminarda Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası, Regional İnkişaf İctimai Birliyinin nümayəndələri, Xüsusi Dövlət Mühafizə Xidməti yanında Hərbi Ovçuluq İttifaqı, Ümumdünya Vəhşi Təbiəti Mühafizə Fondunun (WWF) Azərbaycan nümayəndəliyi, ətraf mühit üzrə müstəqil ekspertlər və müxtəlif rayonlardan olan həvəskar ovçular iştirak etmişlər. Seminar iştirakçıları layihənin mahiyyəti, ov mövsümü və ovçuluq haqqında qanunlar, Azərbaycan təbiəti, qanunsuz ovçuluq və tətbiq edilən cərimələr, ovçuluqda etik qaydalar, Qırmızı Kitaba daxil olan və ov əhəmiyyətli heyvanlar haqqında təqdimatlar keçirmiş və müzakirələr aparmışlar.

Qeyd edək ki, «Məsuliyyətli ovçuluq» adlı ictimai maarifləndirmə layihəsinə 2016-cı ilin iyun ayında IDEA-nın təşəbbüsü ilə Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi və Xüsusi Dövlət Mühafizə Xidməti yanında Hərbi Ovçuluq İttifaqı və Regional İnkişaf İctimai Birliyinin tərəfdaşlığı ilə başlanmışdır.

Layihənin həyata keçirilməsində əsas məqsəd ovçularda təbiətə qarşı məsuliyyətli davranışı təşviq etmək, ovlanması qadağan edilmiş fauna növlərinin öldürülməsi və ovçuluq fəaliyyəti nəticəsində ətraf mühitin çirklənməsi hallarının qarşısının alınmasıdır.

Layihə çərçivəsində məsuliyyətli ovçuluqla bağlı ictimaiyyət, xüsusilə ovçular arasında geniş maarifləndirilmə işləri həyata keçirilmişdir. Bu xüsusda qeyd edilməlidir ki, IDEA tərəfindən ölkəmizin ovçuluq ənənəsi, təbiətimizin və biomüxtəlifliyin mühafizəsinin əhəmiyyəti, ətraf mühitin qorunması kimi dəyərlərin əks olunduğu və məsuliyyətli ovçuluğun təşviqinə həsr olunmuş videoçarx hazırlanmışdır. Həmçinin, ictimaiyyətin, xüsusilə də ov həvəskarlarının məlumatlandırılması məqsədilə layihə tərəfdaşları tərəfindən ovçuluq haqqında ümumi qaydalar, balıq və digər su bioresurslarından istifadə qaydaları və Qırmızı Kitabdan çıxarış kimi kitabçalar hazırlanaraq paylanmışdır.